ربنا يصلح البيوت

أول ما وجد مشكلة زوجية عند صاحبه قالله: (بقولك إيه..عندي صديق بيجيب من الآخر..لو حابب أكلمهولك
أكلمه)
صاحبه قالله: (طب ومين قالك إنه هيعرف يحل الموضوع؟)
قالله: (في كل مشكلة بيني وبين زوجتي بيتدخل وبيقوللي كل اللي هيحصل..وهو قاعد ينصحني بالطلاق وأنا اللي متردد)
صاحبه قالله: (خلاص نكلمه)
في يوم وأنا خارج من المسجد لقيت صديقي بيحكيلي حكاية صاحبه وبيقوللي تعالى معايا كدا شويه نروحله
رحت معاه فعلًا وقعدت مع صاحبه...وقعد يحكيلي ملابسات المشكلة وأنا بسمعله
وفي النهاية قلتله: (ياابني زوجتك زي الفُل.إنت اللي مش عارف تتعامل وكل اللي بتقوله في حقها دي حاجات لازم تفهمها في طبيعة المرأة)..وقعدت أشرح وأوضح له كل الأمور اللي بيشوفها على زوجته
صاحبي لقيته نَط من مكانه كدا وأنا بحنن قلب التاني على زوجته وقاللي: (إيييييه ..أمال إنت بتنصحني بالطلاق ليه ومخليني شايف مراتي شيطان ..ما إنت حنين أهوه )
موقف بسيط زي ده يوضحلك إزاي إن الشباب في الغالب مبيفهموش طبيعة النساء...بيتزوجوا كدا وخلاص من غير دراسة ولا حاجة
بالرغم من إن فهم طبيعة المرأة أصعب من تعلم الطب والهندسة..لإنه ملوش قانون ولا قاعدة...(كل واحده وليها كتالوج.ساعات لما بترجع كمان لوالدها اللي مربيها بتلاقيه محتار في فهم كتالوج بنته...عملية معقدة جدًا)
متاخدش حل كل مشكلة بعرضها على نفسك..ممكن حياتك تكون مختلفة عن غيرك...(فبلاش التعميم في المشكلات...تفصيلة صغيرة ممكن تفرق)
صاحبي اللي نصحته بالطلاق...بعد سنوات من التردد طلق فعلًا وتزوج وأخذ بنصيحتي واكتشف إنه كان بيضيع وقت وإن كلامي كان صح
والتاني حياته مستقرة دلوقتي وقدرت أساعده في فك شفرة كتالوج زوجته...(بالرغم إنه مهندس كان معتقد إنه بيفهم كل حاجة)